Betri samgöngur ohf. hafa óskað eftir því að Umhverfis-, orku og loftslagsráðuneytið veiti undanþágu frá reglugerð um hávaða svo hægt sé að vinna að byggingu Fossvogsbrúar á nóttunni. Er þetta gert vegna beiðni rekstraraðila Reykjavíkurflugvallar, dótturfélags Isavia, um að ekki verði skerðing á starfsemi flugvallarins vegna framkvæmdanna. Í umsögn frá Heilbrigðiseftirliti Reykjavíkur og Heilbrigðiseftirliti Hafnarfjarðar, Kópavogs, Garðabæjar, Seltjarnarnes og Mosfellsbæjar er lýst yfir áhyggjum af þessum áformum á heilsu íbúa í nágrenni við framkvæmdasvæðið.
Bygging Fossvogsbrúar er hluti af framkvæmdum vegna Borgarlínu en hún á að ná yfir Fossvog og verður lögð frá Skerjafirði í Reykjavík og yfir til Kársness í Kópavogi.
Í sameiginlegri umsögn Heilbrigðiseftirlits Reykjavíkur og Heilbrigðiseftirlits Hafnarfjarðar, Kópavogs, Garðabæjar, Seltjarnarnes og Mosfellsbæjar segir að framkvæmdaaðili hafi rökstutt þá þörf að framkvæmdir fari fram á nóttunni þar sem rekstraraðili Reykjavíkurflugvallar hafi farið fram á að rekstur flugvallarins verði ekki skertur á framkvæmdatíma.
Þess er einnig getið að framkvæmdaaðili hafi sett upp hávaðamæla á Kársnesi og við Naustavör 60 í þeim tilgangi að safna gögnum um hávaða, bæði grunngildi og áhrif af völdum framkvæmdanna.
Telja stofnanirnar tvær hins vegar vera líkur á að framkvæmdin valdi hávaða og þar með ónæði sem muni hafa áhrif á íbúa í nágrenninu. Full ástæða sé til að hafa áhyggjur af áhrifum þessa á svefn og hvíld íbúa og þar með heilsu þeirra. Búast megi við að ákveðnir verkþættir flokkist sem sérstaklega háværar framkvæmdir sem séu aðeins leyfilegar á virkum dögum milli klukkan 07:00 og 19:00. Ekki sé hægt að segja til um hversu mikill hávaðinn og þar með áhrifin verði og geti það einungis komið í ljós verði af framkvæmdinni.
Bent er í umsögninni á að mun æskilegra væri ef framkvæmdin færi fram á dagvinnutíma og hvatt er til þess að reynt verði til þrautar að útfæra framkvæmdina og samstarf við rekstraraðila Reykjavíkurflugvallar þannig að stærri hluti verkefnisins fari fram innan tímamarka í reglugerðinni. Einnig er bent á að æskilegra væri að hefja framkvæmdir að norðanverðu til að draga úr áhrifum á íbúðarbyggð í byrjun, þar sem mun fleiri íbúar séu nær framkvæmdasvæðinu að sunnanverðu, á meðan verið sé að safna gögnum til að leggja mat á áhrif framkvæmdanna.
Verði undanþágan veitt er lagt til að veitt verði tímabundin undanþága til loka maí. Á þeim tíma safni framkvæmdaaðili gögnum um hávaða með mælibúnaði sínum og um kvartanir sem kunni að berast. Undir lok maí verði farið yfir gögn sem safnist og tekin afstaða til veitingar frekari undanþágu út frá gögnum og reynslu og hvort þörf sé á frekari mótvægisaðgerðum.
Er lagt til að undanþágan yrði háð vissum skilyrðum.
Að hún verði veitt tímabundið til loka maí eða bundin endurskoðun í lok maí. Framkvæmdaaðili skuli standa að hávaðamælingum á framkvæmdatíma og beri að deila niðurstöðum þeirra með þessum tveimur stofnununum, sem veita umsögnina. Framkvæmdaaðili hafi ítarlegar upplýsingar um framkvæmdina og áhrif hennar, þar með talið hávaða og ónæði, á vefsíðu þar sem almenningur geti nálgast upplýsingarnar. Veita skuli upplýsingar um framgang verksins, niðurstöður hávaðamælinga, tímalengd framkvæmdar, hvaða þættir hennar séu líklegir til að valda ónæði og hvenær unnið verði að þeim þáttum.
Á vefsíðunni skuli vera einföld og aðgengileg leið fyrir íbúa til að koma á framfæri kvörtunum og ábendingum vegna framkvæmdarinnar. Framkvæmdaaðili skuli halda skrá yfir kvartanir og ábendingar sem honum berist svo og viðbrögð hans við því. Verði undanþága veitt sé mikilvægt að framkvæmdaaðili geri það sem hægt sé til að draga úr áhrifunum, að hávaði verði sem minnstur og verktími undir undanþágunni verði eins stuttur og mögulegt sé
