Það getur virst ansi tímafrekt verkefni að afþíða frystinn en það þarf ekki að vera það því það er til einföld og skjót aðferð sem krefst þess aðeins að þú eigir álpappír. Linternaute skýrir frá þessu.
Fram kemur að mælt sé með því að frystirinn sé afþíddur á um hálfs árs fresti. En þetta er auðvitað háð því hversu hratt ís og hrím sest aftur í hann. Ef það gerist mjög hratt, þá getur verið nauðsynlegt að afþíða hann oftar.
Þegar þetta er gert, taka margir frystinn bara úr sambandi og láta ísinn bráðna á náttúrulegan hátt en það getur tekið drjúgan tíma. Aðrir ná sér í spaða og skafa ísinn og hrímið af en það skilar ekki sérstaklega góðum árangri og er tímafrekt.
Þess í stað er hægt að prófa álpappírsaðferðina.
Í öllum sínum einfaldleika gengur hún út á að klæða veggi frystisins með álpappír því hann leiðir hita hratt og lætur ísinn bráðna.
Síðan er stór pottur með sjóðandi vatni settur í frystinn. Hurðinni er síðan lokað og beðið í nokkrar mínútur á meðan hitinn dreifist um frystinn. Þegar þú opnar hann aftur er auðvelt að fjarlægja ísinn með spaða. Ef þú lendir í erfiðum blettum sem láta ekki svo auðveldlega undan, þá getur þú notað heita tusku til að vinna á þeim.
Þessi aðferð er einföld og sparar bæði tíma og krafta og er því mjög praktísk lausn fyrir þá sem vilja afþíða frystinn hratt.
