Marcel stofnaði fyrirtæki sem heitir Radian6 sem óx og dafnaði á sínum tíma. Árið 2011 seldi hann fyrirtækið til Salesforce.com í San Francisco fyrir 35 milljarða króna. Samkomulagið fól í sér að hann héldi áfram að vinna fyrir fyrirtækið í nokkur ár en árið 2015 lét hann gott heita og hætti störfum.
Síðan þá hefur hann helgað líf sitt byggingu smáhýsa fyrir heimilislausa einstaklinga í borginni Fredericton. Þó að Marcel sé vellauðugur nýtur hann þess að klæða sig í vinnugallann á morgnana og taka þátt í smíði húsanna. Segist Marcel vilja gefa af sér til samfélagsins sem hann ólst upp í og gaf honum sjálfum tækifæri til að vaxa og dafna á sínum tíma.
Nú þegar er búið að byggja 99 smáhýsi og eru þau útbúin eldhúsi, einu svefnherbergi og baðherbergi. Greiða íbúar mjög hóflegt gjald fyrir leigu á húsunum og er starfsemin óhagnaðardrifin.
Marcel er ekki hættur því hann er með áætlanir um að stækka samfélagið og bæta til dæmis við kaffihúsi og fyrirtækjum þar sem fólk getur fundið atvinnutækifæri.
Þessi gjörningur Marcel hefur vakið athygli og eru honum margir þakklátir. „Marcel hefur verið algjör himnasending,“ segir Marla Bruce sem býr í einu smáhýsanna í Fredericton. „Fyrir ári síðan var ég heimilislaus en nú á ég heimili og er ekki lengur á götunni. Hér er ró og friður og þetta er gott samfélag,“ segir Marla við kanadíska fjölmiðla.
