Frá og með 1. apríl mega íbúar í Þýskalandi rækta sitt eigið kannabis en ræktunin er þó takmörkuð við þrjár plöntur. Um leið varð refsilaust að vera með allt að 25 grömm af kannabisefnum á sér á almannafæri og heima við má fólk vera með 50 grömm.

Sky News skýrir frá þessu og segir að samkvæmt nýju lögunum þá megi „einkakannabisklúbbar“ sjá allt að 500 félögum fyrir kannabis.

En ákveðnar reglur fylgja auknu frelsi því neytendur verða að vera 18 ára eða eldri og reykingar eru ekki leyfðar nærri leikvöllum og íþróttamiðstöðvum.

Til að koma í veg fyrir að ferðamenn komi til Þýskalands til að kaupa og nota kannabis þá verður sala þess aðeins leyfð í gegnum fyrrnefnda „kannabisklúbba“ og fólk verður að hafa átt lögheimili í Þýskalandi í að minnsta kosti sex mánuði ef það vill kaupa kannabis.