Þessi kostulegi eltingarleikur átti sér stað á laugardaginn. Lögreglu barst tilkynning um mann sem var hafði brotist inn í bifreið og stolið þaðan nokkrum munum. Þjófurinn hafi því næst farið í nálægan garð þaðan sem hann stal reiðhjóli. Nágranni sá til þjófsins og veitti honum eftirför. Við það losaði þjófurinn sig við hjólið og greip til fótanna.
Fljótlega barst lögreglu önnur tilkynning um mann sem hafði komið inn á vinnustað, kýlt þar starfsmann og tekið af honum farsíma. Síðan flúði þrjóturinn af vettvangi. Af lýsingu hins grunaða var talið líklegt að hér væri sá sami og í fyrra útkallinu á ferðinni. Lögregla var send á vettvang og hafði varla náð að kanna aðstæður á vettvangi áður en að þriðja útkallið barst. Að þessu sinni var maður, sem passaði við lýsingu hins grunaða í fyrri útköllum, kominn upp á þak byggingar þaðan sem hann kastaði múrsteinum. Hefði hann þegar valdið eignaspjöllum á aðlægum byggingum.
Lögregla sendi á vettvang sérfræðing í samningaumleitun til að sannfæra hinn grunaða um að koma niður af þakinu. Hinn grunaði, sem lögregla hefur nafngreint sem Romando E. Stanley, þverneitaði öllum samningaviðræðum heldur afréð að flýja enn. Að þessu sinni datt honum það snjallræði í hug að klifra upp á símalínuna sem lá frá þakinu og yfir götuna. Stanley vanmat hversu erfitt verk það er og fór svo að hann strandaði á miðri símalínunni. Áfram neitaði Stanley þó að gefast upp, þrátt fyrir ítrekaðar tilraunir lögreglu. Á sama tíma var ráðist í aðgerðir til að tryggja öryggi Stanley þegar hann óhjákvæmilega félli til jarðar.
Stanley hékk í 45 mínútur áður en þyngdaraflið hafði betur. Eftir stutta viðkomu á slysadeild var hann hnepptur í varðhald og ákærður fyrir rán, þjófnað og illvirki. Á meðan Stanley hékk náði lögreglan meðfylgjandi mynd.
