Í tilkynningu frá lögreglunni í Melbourne í Ástralíu segir að verið sé að rannsaka málið og að talið sé að það sé ekki tilviljun hvaða konur fengu svona undarlega sendingu.
„Lögreglan telur að fórnarlömbin tengist og að þetta sé markviss árás,“ segir í tilkynningunni.
Konurnar virðast allar hafa gengið í sama kaþólska stúlknaskólann 1999. Lögreglan segir að margar þeirra hafi fengið meira en eitt bréf með notuðum smokki.
Lögreglan fékk fyrst veður af málinu í mars og nýjasta bréfið barst á mánudaginn.
Herald Sun segir að konurnar gruni að sendandinn hafi fundið nöfn þeirra í gamalli árbók skólans.
The Guardian segir að innihald bréfanna sé „myndrænt“. Ein konan sagði að bréfið hafi verið óhugnanlegt og hafi komið illa við hana og að hún hafi átt erfitt með svefn eftir að hafa fengið það.