Á föstudaginn birti ríkisfréttastofa landsins, KCNA, mynd sem sýndi að her landsins hefði skotið að minnsta kosti sex eldflaugum á loft samtímis. Reuters skýrir frá þessu.
KCNA segir að þessi eldflaugaskot sýni að Kim Jong-un, einræðisherra landsins, sé að undirbúa sig undir hugsanlegt „alvöru stríð“.
Hann er sagður mjög upptekinn af að gera hinar ýmsu einingar hersins reiðubúnar til að berjast í stríði og af þeim sökum er hann sagður hafa fyrirskipað hernum að stunda æfingar þar sem líkt er eins vel eftir stríði og hægt sé.
Það neistaði á milli einræðisstjórnarinnar og Bandaríkjanna í síðustu viku þegar Kim Yo-jong, systir einræðisherrans, sagði að ætlunin sé að skjóta fleiri eldflaugum út yfir Kyrrahafið. Hún hótaði einnig öllu illu ef einhver skyldi taka upp á því að skjóta flugskeyti og eldflaugar Norður-Kóreu niður.
Norður-kóreumenn hafa einnig sakað Bandaríkin og Suður-Kóreu um að auka spennuna á Kóreuskaga með sameiginlegri heræfingu ríkjanna sem stendur yfir þessa dagana.