ABC News segir að kviðdómur hafi sakfellt Kurczewski fyrir öll ákæruatriðin, þar á meðal morð og þjófnað. Tók það kviðdóminn tvo daga að komast að niðurstöðu.
Kurczewski felldi tár þegar niðurstaða kviðdómsins var lesin upp.
Samkvæmt ákærunni þá hellti hún banvænum skammti af augndropum í vatnsflösku Hernan. Þetta varð henni að bana. Kurczewski var einnig ákærð fyrir að hafa stolið tæplega 300.000 dollurum af Hernan á tveggja ára tímabili.
Kurczewski neitaði sök.
Hernan fannst meðvitundarlaus á heimili sínu þann 3. október 2018. Hún var í stól í stofunni, við hlið borðs sem var fullt af lyfseðilsskyldum lyfjum og einnig voru mulin lyf á bringu hennar. Í fyrstu komst lögreglan að þeirri niðurstöðu að ofneysla lyfja hefði orðið Kurczewski að bana.
Það var Kurczewski, sem var vinkona Hernan og sá um að aðstoða hana, sem tilkynnti lögreglunni að hún hefði komið að Hernan meðvitundarlausri. Hún sagðist telja Hernan hafa verið í sjálfsvígshugleiðingum vegna heilsufars síns.
Þremur mánuðum eftir andlát Hernan hóf lögreglan rannsókn á málinu á nýjan leik í kjölfar þess að niðurstaða efnagreiningar lá fyrir. Hún sýndi að banvænn skammtur af tetrahydrozoline, sem eru augndropar, hefði verið í blóði hennar.
Kurczewski var handtekin í júní 2021. Hún á ævilangan dóm yfir höfði sér.
