Klukkan þrjú aðfaranótt síðasta föstudags var barið að dyrum hjá Kohberger-fjölskyldunni, sem býr í Pennsylvania í Bandaríkjunum. Þegar fjölskyldufaðirinn opnaði dyrnar blasti ótrúleg sjón við honum. Fjöldi lögreglumanna sem voru komnir til að handtaka son hans, Bryan Christopher Kohberger.
Hann var handtekinn, grunaður um að hafa myrt fjóra háskólanema í bænum Moscow í Idaho sjö vikum áður. Moscow er í mörg þúsund kílómetra fjarlægð frá heimili Kohberger-fjölskyldunnar.
Mörgum málum er enn ósvarað um morðin á háskólanemunum fjórum, þar á meðal hvað varð til þess að lögreglan handtók Kohberger eftir sjö vikna rannsókn.
DV hefur áður fjallað um morðin og hér fyrir neðan er hægt að lesa eina af þessum umfjöllunum.
Háskólamorðin í Idaho vekja óhug – Af hverju þurftu þau að deyja?
Það var í Moscow sem Kaylee Goncalves, Madison Mogen, Zana Kernodle og Ethan Chapin, unnusti Kerondle, voru myrt aðfaranótt 13. nóvember. Morðin áttu sér stað um miðja nótt og er talið að fjórmenningarnir hafi verið sofandi þegar morðinginn lagði til atlögu. Tvær stúdínur til viðbótar voru sofandi í húsinu og urðu ekki varar við neitt þetta nótt. Margir hafa velt fyrir sér af hverju morðinginn lét þær óáreittar.+
CBS News hefur eftir Jason LaBar, verjanda Kohberger, að lögreglan hafi komið heim til hans um klukkan 3 aðfaranótt föstudags og að faðir hans hafi farið til dyra. Hann sagði að fjölskyldan hafi verið mjög samstarfsfús.
Hann sagði að Kohberger sé „mjög rólegur“. „Hann er mjög greindur og honum var mjög brugðið (vegna handtökunnar, innsk. blaðamanns),“ sagði LaBar.
CNN hefur eftir ónafngreindum heimildarmönnum, sem segjast þekkja til rannsóknar lögreglunnar, að Kohberger hafi legið undir grun í töluverðan tíma. Hann stundar nám í afbrotafræði. Lögreglan er sögð hafa fylgst með honum síðan fyrir jól og hafi fylgst með öllu sem hann gerði.
Heimildarmennirnir segja að Kohberger hafi komist í kastljós lögreglunnar þar sem lífsýni, sem fundust á morðvettvanginum, hafi tengt hann við málið sem og að hann á samskonar bíl og sást við morðvettvanginn.
Sögðu heimildarmennirnir að Kohberger hafi ekið þvert yfir Bandaríkin fyrir jól til að komast heim til foreldra sinna. Að sögn var byrjað að fylgjast með honum þegar hann var austan við Idaho og fylgdist alríkislögreglan FBI með honum næstu fjóra daga. Á meðan unnu saksóknarar að undirbúningi handtökubeiðni.
Allt gekk þetta upp hjá lögreglunni aðfaranótt föstudags og var þá farið rakleiðis að heimili hans og hann handtekinn. Hann er í haldi og getur ekki fengið lausn gegn greiðslu tryggingar.LaBar sagði í samtali við CNN að Kohberger neiti sök.
Á morgun verður krafa um framsal hans til Idaho tekin fyrir hjá dómi í Pennsylvania og mun Kohberger ekki leggjast gegn framsali að sögn LaBar.
