Debbie Collier, 59 ára gömul kona sem bjó í Georgíu í Bandaríkjunum, yfirgaf heimili sitt þann 9. september síðastliðinn í bílaleigubíl en ekkert náðist í hana í kjölfarið. Daginn eftir, þann 10. september, fékk dóttir Collier, Amanda Bearden, óhugnanleg skilaboð frá móður sinni í gegnum peningagreiðsluforritið Venmo.
„Þeir eru ekki að fara að sleppa mér, elska þig,“ stóð í skilaboðunum sem fylgdu millifærslu upp á 2.385 dollara, um 340 þúsund í íslenskum krónum. Í kjölfarið hafði fjölskylda Collier samband við lögregluna til að tilkynna að hún væri týnd og hófst þá leit að henni.
Degi síðar, þann 11. september, fannst Collier látin, um 96 kílómetrum frá heimili sínu, en lík hennar var nakið og brunnið. Hönd hennar hélt utan um lítið tré þegar hún fannst en við hlið hennar var rauður taupoki og blár segldúkur.
Þrátt fyrir að skilaboðin sem dóttir Collier fékk gefi það í skyn að henni hafi verið rænt þá segir lögreglan að það sé ekki víst. Að minnsta kosti eru engin sönnunargögn sem staðfesta að Collier hafi verið rænt.
Nágranni Collier sem ræddi við New York Post um málið segist hafa heyrt læti koma frá heimili Collier kvöldið sem hún hvarf. Þá segir nágranninn að hún hafi reglulega heyrt öskur frá heimilinu hennar. „Það kom einhver í heimsókn um helgar og á kvöldin og þá var mikið öskrað og rifist,“ segir nágranninn og bætir við að gesturinn hafi verið ung kona.
Lögreglan segir að andlát Debbie Collier verði rannsakað sem morð. Þá segir lögreglan enn fremur að búið sé að sækjast eftir leitarheimildum og ræða við þá sem málið varða. Ekki er búið að gefa út neinar upplýsingar um það hvort einhver sé grunaður um morðið.