Antony fór að gruna að eitthvað óeðlilegt væri á seyði eftir að Ruth eyddi mörg þúsund pundum í fjölskylduferð til Mexíkó. Einnig fannst honum hún oft vera með mikið fé til umráða. Ladbible segir að kvöld eitt hafi Antony sótt Ruth í vinnuna. Hún hafi þá sagt honum að einn íbúi á dvalarheimilinu, kona sem var í hjólastól, ætti 98.000 pund á bankareikningi sínum. „Það var eitthvað við það hvernig hún sagði þetta sem fékk hjarta mitt til að taka kipp. Ég áttaði mig á að Ruth hlyti að hafa aðgang að greiðslukorti viðkomandi og pinnúmeri,“ sagði hann.
Hann sagði að ekkert meira hafi komið fram varðandi þetta en hann hafi haft áhyggjur af þessu. Hann sagði að Ruth hafi keypt margar ferðir til útlanda fyrir fjölskylduna og hafi eytt miklu. Þegar hann spurði hana út í þetta sagði hún að ættingjar hefðu gefið henni mörg þúsund pund.
„Ég vissi ekki hvort ég átti að trúa henni,“ sagði hann.
Nokkrum mánuðum síðar þurfti Ruth að taka sér frí úr vinnu vegna veikinda. Skömmu síðar vaknaði Antony nótt eina þegar hún talaði upp úr svefni. Hann sá þá að á gólfinu, við hlið Ruth, lá veskið hennar og höfðu nokkrir 20 punda seðlar dottið út úr því auk greiðslukorts á nafni fyrrgreindrar konu.
„Ruth var að tala um peninga þegar ég vaknaði. Ég sá veskið á gólfinu og nokkra seðla sem höfðu dottið úr því. Ég fór fram úr til að taka þá upp og setja í veskið, þá sá ég greiðslukortið. Þá small allt, mér leið skelfilega. Ég trúði þessu ekki,“ sagði hann og bætti við að hann hefði tekið málið upp við Ruth þegar hún vaknaði og hafi hún játað allt.
„Ég sagði henni að taka föggur sínar og fara. Þetta nísti í hjartastað. Ég elskaði hana en ég vissi einnig að ég ætti engra annarra kosta völ en að tilkynna um þetta,“ sagði hann.
Hann fór til lögreglunnar og Ruth var handtekin í kjölfarið. Í febrúar á síðasta ári játaði hún fyrir dómi að hafa stolið 7.200 pundum frá konunni. Hún var dæmd í 16 mánaða skilorðsbundið fangelsi og gert að sæta fíkniefnameðferð.