Domino’s hefur gefist upp á að sigra Ítalíu. Bandaríska pítsastaðakeðjan hefur endanlega lokað síðustu 13 búðum sínum í landinu, samkvæmt Bloomberg. Domino’s hafði upprunalega ætlað sér að opna 880 veitingastaði um alla Ítalíu fyrir árið 2030 en náði aðeins að opna 29. Þegar fyrsti staðurinn opnaði þar í landi lofaði fyrirtækið að nota einungis ítölsk hráefni en vonaðist til að vinna Ítali á sitt band með bandarískum nýjungum svo sem ananas á pítsu og ostafyllt skorpa, ásamt heimsendingu í bandarískum stíl.
Það sem stjórnendur bjuggust hins vegar ekki við var að vinsældir heimsendingaforrita sem gera neytendum kleyft að panta mat frá veitingastöðum sem bjóða ekki upp á heimsendingu jukust mikið á árunum eftir að Domino’s mætti til landsins. Þá gat fólk fengið pítsu frá hefðbundnum ítölskum pítsugerðarmönnum senda heim.
Domino’s hætti að keyra út pítsur í Ítalíu þann 29. júlí síðastliðinn en samkvæmt samfélagsmiðlum brá mörgum kúnnum við að staðirnir lokuðu, samkvæmt Bloomberg. Eftir að tilkynnt var skyndibitakeðjan yfirgæfi Ítalíu gerðu ítalskir fjölmiðlar mikið grín að Domino’s fyrir að hafa trúað að þau gætu keppt við ítalska pítsustaði, samkvæmt Fortune. „Domino’s lokar á Ítalíu. Bless að eilífu, havaískar með ananas,“ sagði viðskiptablaðið Affari Italiani.