Sky News skýrir frá þessu og segir að bíllinn geti náð rúmlega 320 km/klst og hafi áður verið í eigu glæpamanna. Nú verði hann notaður til að eltast við afbrotamenn.
Um Ferrari 458 Italia er að ræða. Bíllinn er með 4,5 lítra V8 vél.
Hann verður notaður til að eiga við erfiðustu ökumennina á tékkneskum hraðbrautum og til að glíma við þá sem stunda ólöglegan kappakstur í gegnum mörg lönd. Fyrir heimsfaraldurinn voru um 30 slíkir á ári. Í slíkum kappökstrum eru notaði bílar svipaðir og Ferrari en fram að þessu hefur tékkneska lögreglan ekki haft roð við þeim á hraðbrautunum en nú eru breyttir tímar.
Bíllinn er ekki sá eini sem hald var lagt á í Tékklandi á síðasta ári en tæplega 900 bílar voru þá teknir í vörslu lögreglunnar og meirihluti þeirra var síðan seldur.