Uvade er lítið samfélag og í kjölfar morðanna hefur bæjarstjórnin ákveðið að skólanum verði lokað og hann rifinn. Don McLaughlin, bæjarstjóri, staðfesti þetta á fréttamannafundi að sögn Sky News.
„Það er ekki hægt að biðja barn eða kennara að fara aftur í þennan skóla,“ sagði hann.
Ekki hefur verið ákveðið hvenær skólinn verður rifinn.
Nokkrum klukkustundum fyrir fréttamannafundinn var skýrt frá því að svo margir lögreglumenn hefðu verið komnir á vettvang við skólann þremur mínútum eftir að Ramos fór inn í skólann að þeir hefðu getað stöðvað hann. Þess í stað beið lögreglan átekta fyrir utan skólann í rúmlega eina klukkustund á meðan Ramos myrti 19 börn og tvo kennara.
Steven McCraw, forstjóri almannavarna Texas, segir að lögreglan hafi algjörlega brugðist með þessari „hræðilegu ákvörðun“ sem vettvangsstjóri hennar tók.