Hægt er að tengja of lítinn svefn, syfju að degi til og hrotur við auknar líkur á gláku sem er sjúkdómur sem getur valdið blindu. Rannsóknir benda til að gláka muni leggjast á 112 milljónir manns um allan heim á næstu 20 árum.

Niðurstöður nýrrar rannsóknar benda til að það auki líkurnar á að fá óbætanlegan sjónmissi ef svefninn er ekki nægur. Sky News skýrir frá þessu.

Þegar gláka gerir vart við sig fækkar ljósnæmum frumum í auganu og sjóntaugin skemmist. Ef ekki er brugðist við getur þetta valdið blindu sem er óafturkræf.

Rannsóknin, sem hefur verið ritrýnd, náði til 409.000 manns. Hún hefur verið birt í BMJ Open Journal. Í henni koma fram nokkrar ástæður þess að slæm svefngæði og gláka geti tengst.

Ein er að innri þrýstingur á augað, sem er lykilatriði við þróun sjúkdómsins, aukist þegar fólk liggur og svefnhormónarnir eru í ólagi.

Þunglyndi og kvíði, sem oft koma upp samhliða svefnleysi, geta einnig aukið þrýstinginn og haft neikvæð áhrif á framleiðslu hýdrókortisón sem er aðal stresshormón líkamans.

Endurtekin og langvarandi tímabil með lágu súrefnisstigi í frumum, sem kæfisvefn veldur, geta einnig valdið skaða á sjóntauginni.