Danska ríkisútvarpið segir að nefndin leggi til að hætt verði að flokka kórónuveirufaraldurinn sem sjúkdóm sem ógni samfélaginu frá 5. febrúar en þá rennur núverandi skilgreining faraldursins út. Nefndin leggur til að þær sóttvarnaaðgerðir sem eru í gildi vegna þess að faraldurinn er nú flokkaður sem ógn við samfélagið falli úr gildi um mánaðamótin. Þetta nær yfir nær allar gildandi sóttvarnaaðgerðir, til dæmis notkun andlitsgríma, kröfu um notkun kórónupassa og lokunar næturlífsins.
Nefndin leggur til að áfram verði gerð krafa um að fólk fari í sýnatöku við komuna til Danmerkur og gildi það út febrúar.
Í tillögu nefndarinnar segir að hún hafi tekið sérstaklega með í reikninginn að staðan vegna faraldursins sé gjörbreytt. Nú þýði útbreitt smit ekki eins mikið álag á heilbrigðiskerfið og áður. Hún leggur til að áfram verði skylt að nota andlitsgrímur á sjúkrahúsum og við umönnun aldraðra. Nefndin leggur einnig til að við stóra viðburði eins og tónleika verði reynt að draga úr smithættunni, til dæmis með að gera kröfu um að gestir framvísi kórónupassa, að þeir verði hvattir til að fara í sýnatöku og reynt verði að tryggja góða fjarlægð á milli gesta.