Konan gætti stúlkunnar þennan dag því dagmamman sem gætti hennar venjulega var í fríi.
Það var konan sjálf sem hringdi í neyðarlínuna og óskaði eftir sjúkrabifreið. Stúlkan var strax flutt á sjúkrahús í Herning en síðan til Árósa. Þar lést hún daginn eftir.
Jótlandspósturinn segir að í ákærunni komi fram að bein hafi verið brotin beggja megin í höfuðkúpu stúlkunnar, hálshryggjarliðir hafi verið brotnir og aflagaðir, hún var með áverka á báðum augum og lungum.
Það er því niðurstaða saksóknara að dagmamman hafi „á tímabilinu frá klukkan 06.30 til 15.15 þann 28. nóvember 2019 hrist hina 15 mánaða gömlu stúlku og slegið hana ítrekað í höfuðið með þeim afleiðingum að hún lést af völdum áverkanna“.
Þess er krafist að konan verði dæmd fyrir morð en ef ekki teljist sannað að hún hafi myrt stúlkuna er þess krafist að hún verði dæmd fyrir sérlega grófa og hættulega líkamsárás sem hafi haft dauða í för með sér.
Það liðu um 18 mánuðir frá dauða stúlkunnar þar til lögreglan kærði konuna fyrir „gróft ofbeldi sem hafi haft dauða í för með sér“. Konan var kærð fyrir að hafa hrist stúlkuna og að hafa slegið hana með hörðum hlut.
Konan hefur setið í gæsluvarðhaldi síðan í júní á síðasta ári.
Réttarhöldin hefjast 22. ágúst og er reiknað með að dómur verði kveðinn upp 5. september.