Þýska lögreglan hefur mánuðum saman rannsakað hvort þýski barnaníðingurinn og kynferðisbrotamaðurinn Christian Brückner hafi numið Madeleine McCann á brott úr sumarleyfisíbúð í Portúgal þann 3. maí 2007 og myrt hana. Segist lögreglan vera þess fullviss að hann hafi gert það. Nú hefur Hans Christian Wolters, saksóknari í málinu, varpað sprengju inn í málið með nýjum upplýsingum um rannsókn þess.

Hann segir að belgíska og portúgalska lögreglan rannsaki nú hvort Christian Brückner tengist fimm öðrum álíka málum þar sem ungar stúlkur voru numdar á brott og sumar myrtar. Daily Mail segir að upplýsingar um þessi mál hafi komið fram í nýrri bók.

Meðal þessara mála er eitt frá árinu 2007 en þá var ráðist á 10 ára stúlku 10 kílómetrum frá þeim stað sem Madeleine hvarf frá. Þetta gerðist aðeins mánuði áður en Madeleine hvarf. Christian Brückner er einnig grunaður um nauðgun á tvítugri konu í Praia de Rocha í Portúgal árið 2004.

Í Belgíu er hann grunaður um morð á 16 ára stúlku í bænum De Hana 1996.

Wolters sagði að Christian Brückner væri sá eini sem liggur undir grun í þessum málum.

Christian Brückner afplánar nú dóm í þýsku fangelsi en hann var dæmdur fyrir nauðgun á aldraðri bandarískri konu. Hann hefur einnig hlotið dóma fyrir kynferðisbrot gegn börnum.