Á mánudag í síðustu viku fann lögreglan í New York lík hins áttræða Robert Raynor á Staten Island. Hann hafði verið sleginn í höfuðið og líkamann og lést af völdum áverka sinna.

New York Post skýrir frá þessu. Fram kemur að Raynor hafi verið ber að ofan og því hafi óhugnanlegur texti, sem hafði verið skrifaður á bringu hans, ekki farið fram hjá neinum en þar stóð: „Ég fitla við litlar stúlkur.“ Auk þess á hafði verið skrifað á maga hans: „Ég tek dúkkur með inn í herbergi eins til fimm ára gamalla stúlkna.“ Á öðrum fæti hans stóð: „Ég fitla.“

Enginn er grunaður um morðið og lögreglan veit ekki af hverju Raynor var myrtur. Shakera McFadden, 32 ára dóttir Raynor, sagðist í samtali við New York Post vera í miklu áfalli vegna morðsins. Hún sagðist heldur ekki skilja skilaboðin sem morðinginn hafði skrifað á líkið. „Faðir minn snerti aldrei neinn. Hann snerti aldrei litlar stúlkur,“ sagði hún og bætti við að hann hafi verið krabbameinssjúklingur og hafi átt erfitt með að hreyfa sig. „Hann gat varla lyft handleggjum og fótleggjum. Hann gat eiginlega ekki gert neitt,“ sagði hún.

Lík Raynor fannst klukkan 09.30 síðasta mánudag í íbúð hans á Staten Island. Hann var bara í buxum og var með fjölda áverka og glóðarauga. Nágranni hans segist hafa heyrt mikinn hávaða frá íbúðinni nokkrum klukkustundum áður en lík Raynor fannst, hugsanlega hafi verið um slagsmál að ræða. Raynor hafði margoft komið við sögu lögreglunnar en hann hafði verið handtekinn 24 sinnum. Þar á meðal fyrir vörslu fíkniefna og fyrir að hafa beitt unnustur sínar ofbeldi. En afbrot hans tengjast á engan hátt barnaníði og nágranna hans grunaði aldrei að hann stundaði neitt slíkt. „Hann fór varla út úr íbúðinni og þegar hann gerði það gat hann varla gengið,“ sagði hann.