Fjallgöngumaður sem týndist í Kaliforníu-fylki Bandaríkjanna fannst heill á húfi þökk sé mynd sem hann tók á mánudag. Independent greinir frá þessu.
Hinn 45 ára gamli Rene Compean týndist er hann gekk um vinsælt skíðasvæði í San Gabriel-fjöllum í Suður-Kaliforníu. Hann sendi vini sínum mynd úr fjallgöngunni, sem sýndi fótleggi hans og gríðarlegt gljúfur. Hann sagði að batteríið í símanum hans væri á þrotum og að hann væri týndur. Stuttu seinna hvarf merki sem sýndi staðsetningu hans.
Stuttu seinna tilkynnti vinurinn hvarf Compean og afhenti lögreglu afrit af myndinni. Lögreglan hikaði ekki og hóf leit sem stóð yfir fram á rauða nótt, en ekkert gekk enda náðist ekki í nein merki frá símanum.
Þá greip lögregla til annara ráða. Þau birtu myndina á samfélagsmiðlum og spurðu hvort fólk kannaðist við svæðið sem sæist á myndinni.
Are You an Avid Hiker in the Mt. Waterman Area? #LASD SAR Teams need help locating a #missing hiker. He sent this picture to a friend. His car was found near Buckhorn Campground/Trailhead. Call us if you recognize the area pictured below 818-248-3464. https://t.co/Xi0VL6Mxfi pic.twitter.com/1lUMrgj4y9
— LA County Sheriffs (@LASDHQ) April 13, 2021
Þá kom Benjamin Kuo til bjargar. Sá er mikill klifurmaður sem hefur auk þess gríðarlegan áhuga á að staðsetja myndir. Hæfileikar hans höfðu áður komist að góðum notum þegar skógareldar hafa geisað í Kaliforníu.
„Ég á mér mjög skrýtið áhugamál. Ég elska að taka myndir og finna út hvar þær voru teknar.“ sagði Benjamin Kuo, en þökk sé honum fannst Rene Compean. Hann bar saman myndina við gervihnattarmyndir og kort, og gat á endanum sent vísbendingar á lögreglu.
Lögregla fór strax í málið og fann Compean von bráðar, sem var bjargað með þyrlu. Hér má sjá myndband frá lögreglunni sem sýnir hvernig honum var bjargað.
VIDEO: Hoist Rescue, #LASD Air Rescue 5 deploys LASD SEB Tactical Medics to rescue hiker missing since yesterday in the Mt Waterman area. LASD SAR Teams searched for him throughout the night and all today. Cold, hungry and tired, but uninjured. Saving lives priority 1. 1/2 pic.twitter.com/zNGgIvwxJI
— SEB (@SEBLASD) April 14, 2021
Compean og Kuo hittust svo með hjálp samskiptaforrits, en þá sagði sá fyrrnefndi:
„Ég er svo þakklátur fyrir það sem þú gerðir. Ég veit ekki hvort ég hefði lifað af einn dag í viðbót. Það var svo kalt.“