fbpx
Laugardagur 08.maí 2021
Pressan

Skelfilegt fjölskylduleyndarmál – Var það ástæðan fyrir morðunum?

Kristján Kristjánsson
Mánudaginn 12. apríl 2021 04:41

Hinterkaifeckbýlið var rifið eftir harmleikinn. Minnismerki var síðar reist á lóðinni. Mynd:Andreas Keller/Wikimedia Commons

Ekki missa af Helstu tíðindum dagsins í pósthólfið þitt

Lesa nánar

Nágrannarnir voru órólegir. Þeir höfðu ekki séð neitt til Gruberfjölskyldunnar í fjóra daga. Fjölskyldan var svo sem vön að halda sig út af fyrir sig á Hinterkaifeckbýlinu sínu norðan við München en þau voru góðir og gegnir kaþólikkar og kirkjurækin. Þau höfðu ekki komið til messu þennan sunnudag. Eitt og annað hafði gerst á Hinterkaifeck dagana á undan. Andreas Gruber, fjölskyldufaðirinn, hafði sagt að einhver hefði reynt að brjótast inn í útihúsin. Að auki hafði lykill að íbúðarhúsinu horfið. Síðar hafði hann fundið fótspor í snjónum, þau lágu að býlinu en ekki frá því. Húshjálpin, Maria, sagðist hafa heyrt undarleg hljóð uppi á lofti en enginn tók hana alvarlega.

Mánudaginn 2. apríl 1922 kom Josef Mayer með póstinn á býlið. Hann knúði dyra og kíkti inn um glugga en sá ekkert lífsmark. Hann tók eftir því að barnavagn Josef, yngsta barnsins, var horfinn úr eldhúsinu en þar var hann alltaf. Daginn eftir kom Albert Hofner, vélvirki, til býlisins til að laga landbúnaðartæki. Ekkert lífsmark var á býlinu nema hvað hundurinn var þar. Hofner fór inn í skemmuna og byrjaði að vinna. Viðgerðinni var lokið eftir fjórar klukkustundir. Hann sá þá að einhver hafði bundið hundinn og opnað hlöðudyrnar á meðan hann var að vinna. Einhver var því heima. Nágrannar höfðu einnig séð reyk stíga upp úr skorsteininum.

4. apríl

Síðdegis þann 4. apríl fóru nágrannar fjölskyldunnar heim til hennar til að kanna hvort ekki væri allt í lagi. Þetta voru Lorenz Schlittenbauer, Michael Pöll og Jakob Sigl. Þegar þeir nálguðust býlið sagði Lorenz: „Það er ekkert lífsmark hér. Annað hvort hafa þau öll hengt sig eða verið drepin.“ Hinir tveir litu hvor á annan. Þetta voru ummæli sem þeir mundu síðar.

Í hesthúsinu fundu þeir fjögur lík. Þetta voru hjónin Andreas og Zäzilie Gruber, dóttir þeirra Viktoria og barnabarnið Zäzilie Gabriel. Georg Reingruber, frá morðdeild lögreglunnar í München, lýsti vettvanginum svona: „Miklir höfuðáverkar voru á öllum fjórum líkunum og eitt lá í blóðpolli. Andreas Gruber var bara í buxum og skyrtu. Litla Zäzilie var bara í peysu . . . í fóðurtrogi í horninu var haki.“

Svona var aðkoman í hesthúsinu. Mynd:Polizeidirektion München

 

 

 

 

 

 

 

 

Josef, yngsta barnið, var ekki meðal hinna látnu og heldur ekki húshjálpin Maria. Nágrannarnir fylltust von, kannski hafði Maria bjargað Josef og komið honum í skjól. Þeir fóru inn í íbúðarhúsið. Schlittenbauer tók upp lykil, hinum til mikillar undrunar, og opnaði útidyrnar. Reingruber lýsti aðkomunni í íbúðarhúsinu svona: „Úr eldhúsinu gengum við inn í svefnherbergi. Á gólfinu lá kona í blóðpolli með brotna höfuðkúpu . . . Þetta var húshjálpin Maria Baumgartner. Hún var fullklædd og í leðurstígvélum.  Það voru blóðblettir á gólfinu. Það stóðu þrjú koffort, tvö rúm, vagga og barnavagn í herberginu. Í barnavagninum lá tveggja og hálfs árs sonur ekkjunnar Viktoria Gabriel með brotna höfuðkúpu.“

Dularfullar mannaferðir

Fjölskyldan var vel efnum búin en engu hafði verið stolið. Það eina sem vantaði var matur í búrið. Að auki höfðu kýrnar verið mjólkaðar og dýrin fóðruð. Á þessu var bara ein skýring – morðinginn hafði verið á býlinu í nokkra daga eftir morðin. Hann hafði borðað, kynt upp og annast dýrin á meðan sex lík lágu í húsunum. Það var kannski ástæðan fyrir að öll líkin voru hulin þegar lögreglan kom á vettvang. Líkin í hesthúsinu voru hulin með grasi og tréfleka. Maria var að hluta undir dýnu og kjóll hafði verið lagður yfir barnavagninn sem Josef var í. Allt benti til að brjálæðingur hefði verið að verki.

Josef var í barnavagninum. Mynd:Polizeidirektion München

 

 

 

 

 

 

 

Grunur beindist fljótlega að bakaranum Josef Bärtl sem hafði flúið frá geðsjúkrahúsi í Günzburg nokkrum mánuðum áður. Hann var talinn mjög hættulegur. Kannski hafði hann ástæðu til að hatast við fjölskylduna. En fljótlega gerði lögreglan uppgötvun sem beindi sjónum hennar að einhverjum sem stóð fjölskyldunni nær.

Skelfilegt fjölskylduleyndarmál

Vorið 1914 giftist Viktoria Gruber Karl Gabriel. Um miðjan desember komu boð um að Karl hefði fallið á Vesturvígstöðvunum en fyrri heimsstyrjöldin stóð þá yfir. Faðir Viktoria, Andreas Gruber, sagði þá: „Viktoria þarf ekki á nýjum manni að halda, hún hefur mig.“ Ári síðar varð ljós hvað hann átti við því þá var hann dæmdur í eins árs fangelsi fyrir sifjaspell og Viktoria var dæmd í eins mánaðar fangelsi fyrir sama brot. Um leið og þau voru látin laus tóku þau upp þráðinn þar sem frá var horfið.

Sumir héldu því fram að Karl Gabriel hefði ekki fallið á Vesturvígstöðvunum heldur hefði hann gerst liðhlaupi og gengið til liðs við útlendingahersveitina. Hann hefði síðan snúið aftur til Þýskalands og fjölskyldunnar. Í stað þess að vera tekið opnum örmum hafi hann uppgötvað að eiginkona hans átti í sambandi við föður sinn. Í brjálæðiskasti hafi hann myrt alla á býlinu. En þetta var bara orðrómur sem fékkst aldrei staðfestur og ummerki á vettvangi studdu ekki þessa kenningu.

Sumarið 1918 kynntist Viktoria nýjum manni, Lorenz Schlittenbauer. Hann var einn þeirra þriggja sem komu á býlið og fundu líkin. Það var líka hann sem lét falla ummæli um að öll fjölskyldan hefði verið myrt. Eftir nokkurra mánaða kynni þeirra bað hann Viktoria um að giftast sér en hún sagði nei og það gerði faðir hennar einnig. Hann vildi ekki deila dóttur sinni með öðrum manni.

Hluti af húsakosti býlisins. Mynd:Polizeidirektion München

 

 

 

 

 

 

 

Ári síðar eignaðist Viktoria soninn Josef. Með því að skoða dagatalið sannfærðist Lorenz um að hann væri ekki faðir drengsins. Að öllum líkindum var Andreas bæði faðir drengsins og afi. Lorenz reyndi að gleyma fjölskyldunni enda þótt það væri erfitt því hann bjó skammt frá henni. Hann kvæntist og eignaðist dótturina Önnu en hún lést í mars 1922 nokkrum dögum áður en morðin á Hinterkaifeck áttu sér stað. Fólk sem hitti Lorenz eftir andlát Önnu sagði að hann hefði virst örvinglaður og að það hafi hann verið þegar líkin fundust. Hann er síðar sagður hafa sagt að morðin hafi verið hefnd fyrir blóðskömmina á milli föður og dóttur. „Þetta var refsing guðs,“ er hann sagður hafa sagt.

Í sveitinni „vissu“ allir að Lorenz hefði myrt fólkið. Hann bar sterkar tilfinningar til Gruberfjölskyldunnar og það ekki allar hlýjar. Hann bjó að auki í aðeins 300 metra fjarlægð frá fjölskyldunni og þekkti býlið vel, kannski betur en hann vildi kannast við. Hann var einnig með lykil að húsinu.

Miðlar fengnir til aðstoðar

Lögreglan þreifaði sig áfram í blindni við rannsókn málsins. Háum verðlaunum var heitið fyrir upplýsingar sem gætu leyst málið en allt kom fyrir ekki. Að lokum var gripið til þess ráðs að senda höfuð tveggja fórnarlamba til Nürnberg þar sem tveir miðlar voru fengnir til aðstoðar. Annar fór í trans þegar hann sá höfuðin og lýsti morðingjanum og sagði hann vera feiminn, með hryllilegan hlátur, loðið andlit, stingandi augnaráð og gæti auðveldlega orðið æstur. Þetta þótti ekki sérstaklega gagnlegt.

Ekkert kom fram sem gat leitt lögregluna á slóð morðingjans og málið er enn óuppleyst. Josef Bärtl fannst aldrei. Lorenz var aðeins yfirheyrður tvisvar, í bæði skiptin sem vitni en ekki grunaður. 1941 höfðaði hann mál á hendur nokkrum nágrönnum sínum fyrir ærumeiðingar og hafði sigur. Hann lést síðar þetta ár. Að síðari heimsstyrjöldinni lokinni sögðu hermenn sem snéru heim frá Austurvígstöðvunum að þeir hefðu hitt þýskættaðan sovéskan liðsforingja sem talaði með miklum bæverskum hreim. Hann sagði þeim að hann væri morðinginn frá Hinterkaifec. Þetta styður við kenninguna um að Karl Gabriel hafi ekki fallið í fyrri heimsstyrjöldinni og hafi myrt eiginkonu sína og fjölskyldu hennar auk húshjálparinnar Mariu. Þetta fékkst þó aldrei staðfest með fullri vissu.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Nýlegt

Pressan
Í gær

Sumarhúsaglaðir Danir slá öll met – 142% aukning á bókunum á milli ára

Sumarhúsaglaðir Danir slá öll met – 142% aukning á bókunum á milli ára
Pressan
Í gær

Tölvuleikjaspilari fannst látinn með fjarstýringuna í höndunum – Nú liggur dánarorsökin fyrir

Tölvuleikjaspilari fannst látinn með fjarstýringuna í höndunum – Nú liggur dánarorsökin fyrir
Pressan
Í gær

Bakteríur og annar óþverri – Svona ógeðsleg er andlitsgríman þín

Bakteríur og annar óþverri – Svona ógeðsleg er andlitsgríman þín
Pressan
Fyrir 2 dögum

Falið að rannsaka viðbrögð Pentagon við tilkynningum um fljúgandi furðuhluti

Falið að rannsaka viðbrögð Pentagon við tilkynningum um fljúgandi furðuhluti
Pressan
Fyrir 2 dögum

Segir að Vilhjálmur verði síðasti konungur Bretlands

Segir að Vilhjálmur verði síðasti konungur Bretlands
Pressan
Fyrir 3 dögum

Prestur krefst þess að lögreglan birti myndband af dauða svarts manns

Prestur krefst þess að lögreglan birti myndband af dauða svarts manns