Ungur maður frá Frakklandi á yfir höfði sér allt að tveggja ára fangelsi í Singapore fyrir að sleikja rör úr sjálfsala og koma því svo aftur fyrir í þessum sama sjálfsala.

Singapore er þekkt fyrir að þar í landi er tekið hart á hvers kyns sóðaskap og óspektum.

Atvikið átti sér stað í verslunarmiðstöð í síðasta mánuði. Átján ára gamall piltur frá Frakklandi er sagður hafa tekið rör úr sjálfsala, þar sem hægt er að kaupa appelsínusafa, sleikt það og sett það svo aftur á sinn stað.

Pilturinn, Didier Gaspard Owen Maximilien, hefur verið ákærður fyrir óspektir á almannafæri en við því liggur allt að þriggja mánaða fangelsi, og spellvirki en refsingin fyrir slíkt getur verið allt að tveggja ára fangelsi.

Pilturinn er sagður hafa tekið athæfið upp á myndband og birt það síðan á samfélagsmiðlum en samkvæmt fjölmiðlum í Singapore varð myndbandið til þess að lögreglan þar í landi tók málið til rannsóknar. Fyrirtækið sem sér um sjálfsalann þurfti í kjölfarið að taka öll rör sem voru í sjálfsalanum, alls 500 talsins, henda þeim og setja ný í staðinn.

Pilturinn býr í Singapore en hann er nemandi í þarlendu útibúi fransks skóla, ESSEC Business School. Honum mun hafa verið boðið að vera látinn laus úr fangelsi gegn tryggingu, á meðan málið er til meðferðar í réttarkerfinu, en hann á að koma næst fyrir dóm eftir um þrjár vikur.