Jóhann Skúli Jónsson, gjarnan kallaður Jói Skúli, var gestur Helga Fannars í nýjasta þætti af Íþróttavikunni og með þeim var einnig Hörður Snævar Jónsson.

Arsenal er í góðri stöðu í undanúrslitum Meistaradeildarinnar eftir 1-1 jafntefli gegn Atletico Madrid á útivelli í fyrri leiknum.

Mörgum þykir hitt undanúrslitaeinvígið, milli PSG og Bayern Munchen, sterkara.

„Leiðinlegt að segja þér það en Arsenal tapar alltaf úrslitaleiknum ef þeir komast þangað,“ sagði Hörður við Helga, sem er stuðningsmaður Skyttanna.

„Úrslitaleikur er bara úrslitaleikur, það getur allt gerst þar,“ svaraði Helgi hins vegar áður en Hörður tók til máls á ný.

„Það er bara svo mikill gæðamunur á þessum liðum,“ sagði hann. „Ég held það sé þreytumunur meira. Þú sást þegar Arsenal mætti Bayern í haust,“ sagði Helgi, en Arsenal vann Bayern 3-1 í nóvember.

„Bayern eru raðsigurvegarar, þeir vita að það vinnst ekkert á haustin,“ sagði Hörður þá.

„Það er annað að spila í sprellideildum þar sem þú getur hvílt eins og þú vilt og fengið leikjum frestað,“ sagði Helgi og á þar við þegar PSG fékk mikilvægum leik í frönsku deildinni frestað á dögunum fyrir leik gegn Liverpool í Meistaradeildinni.

„Fyrir mér eru þetta hrútskýringar,“ sagði Hörður að endingu um málið, léttur í bragði, og uppskar mikinn hlátur.

Nánar í spilaranum.