Ástralski sundmaðurinn Scott Miller vann silfurverðlaun á Ólympíuleikunum 1996. En hann virðist hafa snúið sér að óheilnæmu starfi að sundferlinum loknum því hann var nýlega handtekinn en hann er grunaður um að vera leiðtogi fíkniefnahrings.

Samkvæmt frétt dpa þá er Miller grunaður um að hafa ætlað að smygla miklu magni af amfetamíni frá Sydney til annarra svæða í New South Wales.

Talsmenn lögreglunnar hafa ekki skýrt frá nafni Miller en ástralskir fjölmiðlar fullyrða að hann hafi verið handtekinn.

Í tengslum við rannsókn málsins lagði lögreglan hald á metamfetamín að verðmæti sem svarar til um 200 milljóna íslenskra króna. Efnin voru falin í kertum. The Sydney Morning Herald segir að lögreglan hafi að auki lagt hald á meira magn fíkniefna og peninga þegar Miller var handtekinn.