Það getur orðið erfiðara að heimsækja Barcelona í framtíðinni en það hefur verið fram að þessu. Ástæðan er að borgaryfirvöld hafa ákveðið að grípa til aðgerða til að reyna að fækka ferðamönnum sem heimsækja borgina.

New York Times skýrir frá þessu. Meðal þeirra aðgerða sem gripið hefur verið til er að gera leigumiðlunum á borð við Airbnb erfitt fyrir. Samkvæmt nýjum reglum verður að greiða leigu fyrir að minnsta kosti 31 dag þegar herbergi er leigt í einkaíbúð í borginni. Áfram verður þó heimilt að leigja heila íbúð ef eigandi hennar hefur tilskilin leyfi til útleigu.

Það er ekkert nýtt að borgarbúar séu orðnir þreyttir á ferðamönnum en allt frá því að Ólympíuleikarnir fóru fram í borginni 1992 hafa ferðamenn streymt þangað. Tripadvisor segir að borgin sé níundi vinsælasti ferðamannastaður heims.