Samkvæmi í húsnæði, sem er leigt út í gegnum Airbnb, hefur í heimsfaraldri kórónuveirunnar vakið áhyggjur um smit víða. Nú hefur Airbnb brugðist við þessu með því að banna allt samkvæmishald í því húsnæði sem er leigt út í gegnum miðlunina. Markmiðið er að reyna að fá fólk til að virða þær reglur sem hafa verið settar vegna heimsfaraldursins.

Einnig hefur verið ákveðið að nú megi að hámarki 16 manns vera í íbúðum sem eru leigðar í gegnum Airbnb. Á þessu eru nokkrar undantekningar. BBC skýrir frá þessu. Fram kemur að í tilkynningu frá Airbnb segi að það að taka upp bann á heimsvísu gegn samkvæmum og uppákomum í íbúðunum sé til bóta fyrir lýðheilsu.

Airbnb segir að 73 prósent af leigusölum leyfi ekki samkvæmi í íbúðum sínum. Sumir leyfa þó minni samkvæmi á borð við afmæli. Fyrirtækið viðurkennir að sumir gestir hafi tekið upp á því að viðhafa einhverskonar bar- og klúbbstarfsemi í íbúðum sem þeir hafa leigt í gegnum fyrirtækið.