„Við höfum sannanir fyrir að Kínverjar reyni að seinka þróun bóluefnis gegn kórónuveirunni.“ Þetta sagði Rick Scott, þingmaður repúblikana í öldungadeild Bandaríkjaþings, á sunnudaginn.

„Við verðum að fá þetta bóluefni. Því miður höfum við sannanir fyrir að kommúnistarnir í Kína reyni að eyðileggja þróunarstarfið eða seinka því.“

Hefur BBC eftir honum.

„Kínverjar vilja ekki að við verðum fyrstir með bóluefni. Þeir hafa ákveðið að vera andstæðingar Bandaríkjamanna og þar á ég við lýðræði um allan heim.“

Hann vildi ekki skýra nánar frá smáatriðum þegar hann var spurður út í hvaða sönnunargögn liggi að baki ummælum hans nema hvað að þetta kæmi frá leyniþjónustustofnunum.

„Þetta bóluefni skiptir virkilega miklu máli til að við getum komið efnahagslífinu í gang á nýjan leik. Ég held að ef Englendingar verða fyrstir með það þá muni þeir deila því með heiminum. Kommúnistarnir í Kína munu ekki deila því með heiminum.“

Scott hefur áður tekið sér stöðu sem harður gagnrýnandi Kína. Fyrir nokkrum dögum krafðist hann þess að Kínverjar verði dregnir til ábyrgðar fyrir að hafa leynt mikilvægum upplýsingum um kórónuveiruna fyrir Alþjóðaheilbrigðismálastofnuninni WHO. Kínverjar biðu í rúma viku með að opinbera erfðafræðilega uppbyggingu veirunnar eftir að þrjár rannsóknarstofur þar í landi höfðu kortlagt hana. AP fréttastofan skýrði frá þessu í síðustu viku og byggði á gögnum frá WHO.