Yfirvöld í New York ræða nú lagafrumvarp um tvöföldun opinberra gjalda á bjór í ríkinu. Frumvarpið virðist njóta góðs stuðnings en samkvæmt því á að nota hluta af hinu hækkaða gjaldi til að auka fjárframlög til háskóla í ríkinu.

Bloomberg skýrir frá þessu. Það er demókratinn Harvey Epstein sem lagði frumvarpið fram. Hann telur að þetta geti skipt miklu máli fyrir fjárhag háskólanna. Ef frumvarpið verður samþykkt munu opinber gjöld á bjór hækka um 50 milljónir dollara á ári.

Epstein telur að hægt sé að nota þessa peninga til að brúa það bil sem er á milli þess kostnaðar sem fylgir því að stunda háskólanám og þess sem íbúar ríkisins hafa efni á.

En það þarf kannski ekki að koma á óvart að samtök bjórframleiðenda í ríkinu eru á móti frumvarpinu og telja að það muni koma niður á vexti greinarinnar. Nú eru opinber gjöld á bjór í New York 14 cent á hvert gallon (um 3, 8 lítrar).