Þýskir stjórnmálamenn, opinberar stofnanir og samtök umhverfissinna þrýsta nú á að 130 km/klst hámarkshraði verði settur á allar hraðbrautir landsins. Þetta fer illa í marga Þjóðverja því í þýsku þjóðarsálinni fyllir það mikið að þeir megi keyra eins hratt og þeir vilja þrátt fyrir að fáir nýti sér möguleikann.
Í haust var málið tekið fyrir á sambandsþinginu og voru umræðurnar heitar. 498 þingmen voru á móti því að setja 130 km/klst hámarkshraða á hraðbrautirnar en 126 voru því fylgjandi. En umræðan hefur síður en svo sofnað eftir atkvæðagreiðsluna.
Tímaritið Autobild fjallaði nýlega um málið og mismunandi rök fyrir og á móti hámarkshraða. Hvað varðar umferðaröryggi eru skoðanir skiptar. Samkvæmt tölfræðinni verða flest slys á þýskum hraðbrautum vegna hraða en ekki liggur fyrir hversu hátt hlutfall þeirra verður þegar ekið er hraðar en 130 km/klst. ADAC, samtök þýskra bifreiðaeigenda, telja að ekki verði fleiri slys í Þýskalandi en þeim löndum sem landið ber sig yfirleitt saman við. Samtökin segja að veiki punkturinn í umferðaröryggi sé á þjóðvegum landsins þar sem flest banaslys verði.
Sérfræðingar eru ekki á einu máli um hvort það hraðatakmarknir muni bæta umferðarflæði eða gera það verra. Sá hluti málsins snýst fyrst og fremst um hversu margir bílar eru á vegunum hverju sinni.
Andstæðingar hraðatakmarkana benda á að þeir komist fyrr á áfangastað ef enginn hámarkshraði er. Þýsk rannsókn frá 2004 sýndi þó að með ótakmörkuðum hámarkshraða sparist aðeins 5 til 7 mínútur á hverja 100 km.