Samkvæmt fréttum þýskra fjölmiðla kom morðinginn aftan að fórnarlambi sínum og skaut það tvisvar í höfuðið og hjólaði síðan á brott. Khangoshvili var í útlegð í Berlín en hann barðist með hersveitum Tsjetsjeníu gegn rússneskum herjum frá 2001 til 2005. Hinn handtekni er Rússi.
Í tilkynningu frá saksóknara kemur fram að skammbyssan, sem var notuð við morðið, sé af tegundinni Glock 26 og hafi verið með hljóðdeyfi. Lögreglan fann byssuna og reiðhjólið í ánni. Hann handtekni er nefndur Vadim S. í þýskum fjölmiðlum sem segja að í íbúð hans hafi fundist mikið af reiðufé. Hann hefur verið kærður fyrir morð.
Hann kom til Berlín frá Moskvu, með viðkomu í París, nokkrum dögum fyrir morðið og var með flugmiða aftur heim til Moskvu. Það þarf kannski ekki að undra að grunur beinist að aðild rússneskra stjórnvalda að morðinu enda ekki langt síðan þau voru bendluð við morðtilraun við Skripal-feðginin á Englandi og við morðið á liðhlaupanum Alexander Litvinenko árið 2006.
Khangoshvili flúði til Þýskalands eftir að hafa sloppið naumlega á lífi frá morðtilraun í Tbilisi, höfuðborg Georgíu, 2015. Átta skotum var þá skotið á hann og særðist hann en tókst að komast á sjúkrahús þar sem lífi hans var bjargað.
Rússneska leyniþjónustan er sögð hafa haft mikinn áhuga á að koma honum fyrir kattanef vegna stríðsreynslu hans. Margir félagar hans hafa einmitt verið myrtir á undanförnum árum.