Mörg þúsund manns búa við ömurlegar aðstæður í flóttamannabúðum á tveimur grískum eyjum. Nú hafa grísk stjórnvöld fengið nóg af þessu og í síðustu viku voru samþykkt ný lög sem eiga að auðvelda þeim að senda innflytjendur og hælisleitendur úr landi. Kyriakos Mitsotakis, forsætisráðherra, sagði að nú væri komið nóg.

Mikill straumur flóttamanna hefur verið til Grikklands frá Sýrlandi. Þar búa margir þeirra í þéttskipuðum flóttamannabúðum sem eru löngu orðnar yfirfullar. Þetta hefur orðið til þess að hin þriggja mánaða gamla miðjuhægristjórn landsins ætlar að taka upp mun harðari línu gagnvart flóttamönnum en forverar hennar sem voru á vinstri væng stjórnmálanna. Nýja ríkisstjórnin hefur heitið því að senda 10.000 flóttamenn úr landi fyrir árslok 2020.

Gríðarlegt álag er á hælisumsóknarkerfið og tekur afgreiðsla mála allt að 6 ár.

Nýju lögin hafa verið harðlega gagnrýnd af mannréttindasamtökum, hjálparsamtökum og stjórnarandstöðunni. Óttast er að með nýju lögunum eigi að takmarka réttindi hælisleitenda á ýmsum sviðum.

Dunja Mijatovic, sem fer með mannréttindamál í framkvæmdastjórn ESB, segir að aðstæður í flóttamannabúðum á eyjunni Lesbos séu hræðilegar og stórslys sé yfirvofandi. Þar eru tæplega 17.000 manns í flóttamannabúðum sem eiga aðeins að hýsa 2.840.