Hótununum fjölgaði mikið fyrir nokkrum mánuðum eftir að Liliana, sem hefur verið útnefnd sem öldungadeildarþingmaður á ítalska þinginu til æviloka, bað þingið um að setja á laggirnar sérstaka nefnd til að berjast gegn rasisma, gyðingahatri, hatursglæpum og ofbeldi gagnvart minnihlutahópum.
Tillagan var samþykkt þrátt fyrir að hægriflokkarnir Lega, Forza Italia og fleiri hafi sniðgengið atkvæðagreiðslu um hana segir BBC.
Liliana fæddist í Mílanó 1930. Hún flúði undan nasistum ásamt föður sínum í desember 1943. Þeim mistókst að komast til Sviss og enduðu í höndum nasista og voru send til Auschwitz. Hún var eitt 776 ítalskra barna undir 14 ára aldri sem voru send í þessar alræmdu útrýmingarbúðir. Þar létu faðir hennar og afi og amma lífið. Eftir ársdvöl þar var hún flutt í útrýmingarbúðir í Ravensbrück í Þýskalandi. Nokkrum vikum síðar var hún flutt í enn aðrar búðir þar sem hún var til rússneskir hermenn náðu þeim á sitt vald.
Aðeins 25 af ítölsku börnunum 776 lifðu dvölina í Auschwitz af. Hún flutti aftur til Ítalíu eftir stríðið. Það var ekki fyrr en um 1990 sem hún fór að segja opinberlega frá tímanum í útrýmingarbúðunum og vann hún ötullega að því að fræða ungt fólk og börn um þann mikla hrylling.
Hún fær nú svo alvarlegar hótanir að lögreglan gætir nú öryggis hennar og hefur hafið rannsókn á þeim hatursummælum sem henni hafa borist.
