Stuðningsmenn Arsenal telja að ástin hafi átt stóran þátt í bættu gengi sænska framherjans Viktors Gyökeres á síðustu vikum. Framherjinn, sem kom til félagsins frá Sporting Lissabon síðasta sumar fyrir um 64 milljónir punda, hefur farið mikinn eftir erfiða byrjun á ferlinum í London.

Gyökeres skildi við portúgölsku leikkonuna Ines Aguiar áður en hann flutti til Englands. Samkvæmt fréttum vildi hann einbeita sér alfarið að knattspyrnunni og skilja einkalífið eftir í Portúgal þar sem ljóst var að hann myndi yfirgefa Sporting.

Byrjun hans hjá Arsenal olli þó ákveðnum vonbrigðum og bæði stuðningsmenn og sparkspekingar gagnrýndu framlag hans í sóknarleik liðsins. Formið hefur hins vegar tekið miklum breytingum undanfarna mánuði og Gyökeres er orðinn lykilmaður í liði Mikel Arteta á lokaspretti tímabilsins.

Portúgalskir miðlar segja nú að Gyökeres og Aguiar séu aftur byrjuð saman. Aguiar birti meðal annars mynd frá leik Arsenal gegn Mansfield í enska bikarnum í mars og sást einnig á Emirates-leikvanginum þegar Arsenal vann Fulham 3-0 um síðustu helgi. Þar skoraði Gyökeres tvö mörk.

Frá því að samband þeirra blossaði upp á ný hefur sænski landsliðsmaðurinn skorað sex mörk í tólf leikjum fyrir Arsenal.