Nikolas Cruz, 19 ára Bandaríkjamaður, skaut sautján manns til bana og særði 17 til viðbótar, þegar hann hóf skothríð í Marjory Stoneman-menntaskólanum í Parkland í Flórída þann 14. febrúar 2018. Eðli málsins samkvæmt var árásin öllum mikið áfall enda árásir sem þessar verið tíðar í Bandaríkjunum á undanförnum árum.
Við rannsókn málsins kom í ljós að Cruz hafði keypt skotvopnið sem hann notaði í verslun Dick’s Sporting Goods. Óhætt er að segja að forsvarsmenn verslunarkeðjunnar hafi lagt sín lóð á vogarskálarnar til að tryggja að harmleikur sem þessi endurtaki sig ekki.
Verslunin ákvað að hætta að selja hálffsjálfvirka árásarriffla í kjölfar árásarinnar, en sat þá uppi með talsverðan lager af slíkum skotvopnum. Í stað þess að koma vopnunum til annarra birgja ákvað fyrirtækið að gera sitt til að tryggja að skotvopnin enduðu ekki á götunni.
„Ég sagði: Ef okkur er alvara með það að koma þessum vopnum af götunni þá þurfum við að eyðileggja þau,“ segir Ed Stack, stjórnarformaður og eigandi Dick’s. Vopnin, sem metin voru á 5 milljónir dala, rúmar 600 milljónir króna, voru send í brotajárn.
Í samtali við Fox News rekur Ed ástæðuna fyrir því að fyrirtækið ákvað að hætta að selja þessar byssur. „Við komumst að því að við höfðum selt þessum strák skotvopn. Hann hafði keypt hana á löglegan hátt. Þá sagði ég að nú væri nóg komið. Við erum hætt.“