Michelle veitti því athygli þegar maður, líklega á fertugsaldri, gekk fram hjá henni og lét plastflösku í sandinn. Í raun var um að ræða ósköp venjulega vatnsflösku, með límmiða á, en að þessu loknu kom maðurinn sér fyrir skammt frá Michelle.
„Ég horfði á hann gera þetta og hugsaði mér af hverju í ósköpunum hann henti ekki flöskunni í ruslið,“ segir Michelle við News.co.au. Hún tók eftir því að eitthvað dularfullt væri á seyði þegar hún tók flöskuna upp. Það var þá sem hún tók eftir því að lítil myndavél var falinn inni í flöskunni.
Michelle segir að maðurinn hafi forðað sér á hlaupum þegar Michelle tók flöskuna upp og sá hvað var inni í henni. Michelle tók myndavélina með sér heim, en í henni var 32 gígabæta minniskort. Á minniskortinu voru allskonar myndbönd, aðallega af konum og ungum börnum á ströndinni.
Lögreglan staðfesti við News.co.au að málið hefði ratað inn á borð hennar og væri nú í rannsókn. „Rannsóknin er á frumstigi og við getum ekki veitt frekari upplýsingar,“ sagði upplýsingafulltrúi lögreglu.
Michelle hvetur fólk til að vera á varðbergi og hafa augun hjá sér.