Vísindamenn velta nú fyrir sér hvort möguleiki sé á að tasmaníutígurinn, sem talinn er hafa dáið út árið 1936, sé enn til. Þessi tignarlega skepna hélt til á meginlandi Ástralíu, Papúa Nýju-Gíneu og á Tasmaníu sem að lokum voru einu þekktu heimkynni hans.
Ofveiði varð til þess að mjög fækkaði í stofni tasmaníutígursins, en dýrin áttu það til að ráðast á búfénað. Yfirvöld brugðu á það ráð að borga fyrir hvert veitt dýr sem leiddi til ofveiði með fyrrgreindum afleiðingum.
En samkvæmt nýbirtum gögnum ástralskra yfirvalda hefur dýrið sést að minnsta kosti átta sinnum eftir þetta, nú síðast fyrir aðeins tveimur mánuðum.
Þá var tilkynnt um tasmaníutígurinn í febrúar síðastliðnum. Áströlsk hjón sáu þá skepnu ganga yfir veg í Tasmaníu og sögðust þau hafa séð skepnuna mjög greinilega í 10-15 sekúndur. Kváðust þau sannfærð að um tasmaníutígur væri að ræða, ekkert annað kæmi til greina. Þá eru rakin önnur nýleg dæmi, til dæmis eitt frá 2017.
Hvort um einhver önnur dýr en tasmaníutígur hafi verið að ræða skal ósagt látið. Tasmaníutígurinn minnti um margt á stórt kattardýr, ref eða jafnvel úlf.
