Elon Musk, stofnandi Space-X, hyggst senda fólk af stað til Mars 2024 og bandaríska geimferðastofnunin NASA hyggst ráðast í slík verkefni á fjórða áratug aldarinnar. Þetta er langt ferðalag því meðalfjarlægðin á milli Mars og jarðarinnar er 225 milljónir kílómetra.
En nú eru góðar fréttir fyrir þá sem langar til Mars því þeir þurfa ekki að fara lengra en til norðurhluta Spánar. Þar hefur fyrirtækið Astroland útbúið „geimstöð“ í helli í Cantabria. Hann er 50 metra hár og 1,2 km að lengd. Staðurinn er afskekktur til að líkjast erfiðum aðstæðum á Mars.
Það var teymi vísindamanna, arkitekta og verkfræðinga sem hannaði og útbjó „geimstöðina“ sem rúmar 10 manns. Þar eru tilraunastofur, geimbúningar, gróðurhús, vélmenni og stöðin er sjálfri sér næg um vatn og rafmagn eins og raunveruleg geimstöð.
Þeir sem hafa áhuga á dvöl þarna þurfa að hafa vaðið fyrir neðan sig og skipuleggja það tímanlega því töluverðan undirbúning þarf undir dvölina þarna. Þátttakendur verða einnig að standast líkamleg og andleg próf.
Dvölin kostar 5.000 evrur en innifalið er 26 daga þjálfun á netinu, þriggja daga erfiðar æfingar, þrír dagar í „geimstöðinni“ og nótt á hóteli og hátíðarkvöldverður.
