Búið er að bjarga fjórum strákum hið minnsta út úr hellinum í Taílandi þar sem þeir hafa setið fastir síðan  þann 23. júní. Reuters segir að sex strákar séu nú komnir út en það hefur ekki enn verið staðfest af yfirvöldum. Mikill viðbúnaður er á vettvangi en þar eru að minnsta kosti 13 sjúkrabílar og jafn margar þyrlur til reiðu. Þá eru 13 læknateymi á vettvangi en hver strákur fær eitt læknateymi sem sér algjörlega um hann.

Fyrst var komið með tvo stráka út úr hellinum og gerðist það fyrr en von var á. Þeir voru strax skoaðir af læknum og síðan fluttir með sjúkrabifreiðum smá spöl að lendingarsvæði þyrla en þaðan var flogið með þá á sjúkrahús í Chiang Rai.

Strákunum er skipt í fjóra hópa við björgunina, fjórir í þeim fyrsta og þrír í hinum þremur. Þjálfari þeirra verður síðastur í röðinni. 18 atvinnukafarar vinna við björgunina.

The Guardian segir að vatnið í hellakerfinu sé minna en menn áttu von á og því hafi björgunarstörfin gengið betur en reiknað var með. Strákarnir hafi ekki þurft að kafa og synda eins mikið og talið var og hafi getað gengið þess í stað.

Hér er hægt að horfa á beina útsendingu þar sem fylgst er með atburðarrásinni.

Uppfært klukkan 15:15

Erlendir fjölmiðlar segja nú að fjórir drengir séu komnir út og hlé hafi verið gert á aðgerðunum að sinni.