Baldvin Már Borgarson, þjálfari 3. deildarliðs Árbæjar, mun ekki mæta aftur til starfa fyrr en félagið greiðir honum laun sem hann á inni.

Það var vakin athygli á því í Betkastinu að Baldvin hefði ekki stýrt Árbæ í síðustu leikjum í kjölfar þess að hafa losnað úr banni sem hann var dæmdur í fyrir nokkrum vikum síðan.

Baldvin segir við Fótbolta.net að hann eigi inni laun hjá félaginu og það nokkuð háa upphæð. Samkvæmt heimildum 433.is er upphæðin rúm milljón króna.

Hann hafi tjáð formanni Árbæjar að hann hyggðist ekki mæta aftur til vinnu fyrr en hann fengi að minnsta kosti 60 prósent þeirra launa sem hann á inni.

Auk þess að vera þjálfari hefur Baldvin vakið athygli sem spekingur í hinum ýmsu hlaðvarpsþáttum um knattspyrnu.