Ævar Austfjörð hefur vakið talsverða athygli síðustu misseri fyrir mataræðið sitt, en hann borðar eingöngu kjöt. Hann sagði frá því í Bítinu á Bylgjunni snemma á þessu ári að hann borði fjögur hamborgarabuff í morgunmat.
„Ég steiki hamborgarabuff medium og gúffa þeim bara í mig, sex til sjö hundruð grömmum. Það er morgunmatur,“ sagði Ævar, sem borðar að sjálfsögðu ekkert meðlæti með, hvorki grænmeti, brauð né franskar. „Ég verð saddur af því og líður best.“
Nú virðist Ævar hafa prófað svolítið nýtt, ef marka má Facebook-síðu hans.
„Ég nennti ekki að elda morgunmatinn,“ skrifar Ævar við myndband þar sem hann sést borða hamborgarabuff hrátt í morgunmat. Þetta hefur farið misvel ofan í vini hans.
„Nú ertu að tapa glórunni, drengur minn,“ skrifar einn vina hans og annar bætir við: „Neiiiii nú segi ég stopp.“
Enn annar vinur hans segir þetta fulllangt gengið, en þá svarar Ævar:
„Ótrúlega margir sem borða hrátt. Flestir vegna meltingarvandamála. Það hefur aldrei höfðað til mín þó ég hafa smakkað hrátt af og til. Í morgun hreinlega langaði mig í kjötið hrátt þannig að…hví ekki.“
Þá er Ævar spurður hvort hann hafi fundið mikinn mun á kjötinu hráu eða elduðu.
„Borðaði minna en ég hélt að ég þyrfti. Líður mjög vel eftir á. Finn svona „sharpness“ í kollinum.“
Myndbandið umdeilda má horfa á hér fyrir neðan: