Frá árinu 2022 hefur umsóknum um alþjóðlega vernd fækkað um rúmlega 61 prósent. Frá þessu greinir Þorbjörg Sigríður Gunnlaugsdóttir dómsmálaráðherra í færslu á Facebook. Nú sem og síðustu ár eru flestir umsækjendur að flýja stríðið í Úkraínu. Þorbjörg segir að þegar núverandi ríkisstjórn hafi tekið við völdum hafi blasað við stefnuleysi í útlendingamálum. Svarið við þessari stöðu liggi hvorki í opnum né lokuðum landamærum heldur í skynsamlegri stefnu og stjórn.
„Þegar ég tók við embætti dómsmálaráðherra blasti við stefnuleysi í útlendingamálum. Skilaboð voru óskýr, aðgerðir sundurlausar og almenningur upplifði stjórnleysi. Tiltrú á kerfið fór minnkandi og það þurfti að breyta um stefnu.
Staðreyndir skipta máli í þessari umræðu.Frá árinu 2022 hefur umsóknum um alþjóðlega vernd fækkað um rúmlega 61%. Stærsti hluti umsækjenda hefur verið fólk frá Úkraínu sem flýr stríð.
Fyrstu fjóra mánuði ársins 2026 voru 73% umsækjenda frá Úkraínu. Það er því einfaldlega rangt þegar því er haldið fram að flestir umsækjendur komi ekki frá Úkraínu.“
Ríkisstjórnin hafi ráðist í raunverulegar breytingar og lagasetningu, svo sem með því að afnema séríslensku 18 mánaða regluna, með því að styrkja Schengen-eftirlit, lögfesta skyldur flugfélaga til að afhenda farþegalista, með framlagningu frumvarps um brottfarastöðu og með því að tryggja að afbrot geti leitt til afturköllunar verndar.
Þorbjörg segir að Ísland eigi að standa vörð um mannréttindi og alþjóðlegar skuldbindingar en á sama tíma þurfi að standa vörð um öryggi, réttarríki og traust almennings.
„Þessi sjónarmið útiloka ekki hvort annað. Þau eru grunnurinn að frjálslyndu samfélagi. Útlendingamálin hafa allt of lengi verið eftirlátin jöðrunum. Svarið liggur ekki í opnum eða lokuðum landamærum. Svarið liggur í skynsamlegri stefnu og stjórn. Opnustu reglurnar og minnsta eftirlitið endurspegla ekki mestu mannúðina.
Aðflutt fólk auðgar íslenskt samfélag og gegnir mikilvægu hlutverki í íslensku atvinnulífi. En forsenda þess að samfélagið haldi áfram að vera opið og frjálslynt er að almenningur upplifi að stjórnvöld hafi stjórn á kerfinu. Við ætlum að tryggja bæði góða stjórn og góðar móttökur.Skýrar reglur og stjórnsýslu og raunveruleg tækifæri fyrir það fólk sem hér sest að.“
Með færslunni birtir dómsmálaráðherra yfirlitsmynd um umsóknir um alþjóðlega vernd þar sem sjá má að umsóknum hefur fækkað gríðarlega frá árinu 2022. Á tímabilinu janúar-apríl á þessu ári hafa 452 umsóknir borist en af þeim koma 73 prósent frá Úkraínumönnum. Árið 2022 bárust 4521 umsókn og þar af komu 51,7 prósent frá Úkraínumönnum.
