Hógvær hækkun gjalda, aukin áhersla á grunnfög, tryggt aðgengi að bílastæðum og samræmt námsmat við lok grunnskólagöngu eru þau mál sem njóta mests stuðnings þátttakenda í kosningaprófi Viðskiptaráðs fyrir sveitastjórnarkosningar sem fram fara 16. maí. Yfir 7.000 manns hafa nú tekið kosningaprófið, þar sem afstaða er könnuð til 30 fjölbreyttra málefna.
Tíu vinsælustu málin
Flestir eru fylgjandi því að borgin hækki ekki gjaldskrár umfram verðbólgumarkmið og fasteignagjöld umfram verðlagsþróun. Sé miðað við kosningaáttavita Viðskiptaráðs, þar sem framboð í borginni voru spurð um afstöðu þeirra til sömu mála, eru öll framboð nema eitt fylgjandi hógværum hækkunum.
Þegar kemur að menntamálum eru flestir fylgjandi því að auka áherslu á grunnfög í grunnskóla, líkt og lestur, stærðfræði og íslensku. Einnig voru flestir fylgjandi endurupptöku einkunna í tölustöfum auk innleiðingar samræmda prófa við lok grunnskólagöngu.
Fækkun borgarfulltrúa úr 23 í 15 naut vinsælda auk þess að afnema ætti 70% laun fyrstu varaborgarfulltrúa allra flokka.
Önnur mál nutu hins vegar dræmari stuðnings meðal þátttakenda. Þar sker sig sérstaklega úr spurning um upptöku umferðargjalda á háannatímum, en 67% voru andvíg því á meðan 18% voru fylgjandi. Sala á hlut í Orkuveitu Reykjavíkur var einnig óvinsæl en um 59% þátttakenda lýstu sig andvíga sölunni.
Heilt yfir sýna niðurstöður kosningaprófsins að meirihluti þátttakenda er fylgjandi tugum góðra mála sem eru til þess fallin að auka hagsæld í borginni. Vert er að taka fram að svör þátttakenda í kosningaprófinu þurfa ekki að endurspegla afstöðu allra kjósenda, einnig er ekki hægt að ganga úr skugga um að aðeins íbúar Reykjavíkurborgar hafi svarað könnuninni. Engu að síður gefa niðurstöðurnar vísbendingu um afstöðu kjósenda til þessara mála.
Niðurstöður kosningaprófsins í heild sinni eru nú öllum aðgengilegar á vef Viðskiptaráðs.
