Ítalska liðið Como gæti þurft að spila Evrópuleiki sína annars staðar en á heimavelli sínum, Stadio Giuseppe Sinigaglia, þar sem hann uppfyllir hugsanlega ekki reglur UEFA.
Mikill uppgangur hefur verið hjá Como síðustu ár undir stjórn Cesc Fabregas, sem kom liðinu upp úr B-deildinni og er nú þegar búinn að tryggja Evrópusæti þegar tvær umferðir eru eftir af Serie A. Liðið fer að minnsta kosti í Sambandsdeildina en á enn möguleika á sæti í Evrópu- eða Meistaradeild.
Helsta vandamálið við völlinn þeirra snýr að stúku sem er byggð á bráðabirgðastálgrindum, en UEFA krefst varanlegra mannvirkja á leikvöngum sem eiga að hýsa Evrópuleiki á háu stigi. Þá þarf einnig að breikka völlinn og stækka svæðið milli vallarlínu og auglýsingaskilta.
Ef ekki tekst að leysa þetta í tæka tíð gæti Como þurft að færa heimaleiki sína í Evrópu annað.
Mikið er fjallað um þetta í ljósi þess að mörgum þykir heimavöllur Como einn sá fallegasti í heimi vegna vallarstæðisins, en hann er við hið fræga Como-vatn.
