Fyrir skömmu setti Terra af stað nýjan styrktarsjóð sem ætlaður er einstaklingum og sprotafyrirtækjum með verkefni sem tengjast umhverfis- og nýsköpunarmálum. Markmið sjóðsins er að styðja við hugmyndarík verkefni sem geta haft jákvæð áhrif á samfélagið og stuðlað að aukinni sjálfbærni eins og segir í tilkynningu. 

„Það er einstaklega ánægjulegt að segja frá því að viðbrögðin hafa farið langt fram úr væntingum en nú þegar hafa yfir 40 umsóknir borist í sjóðinn. Fjölbreytileiki verkefnanna og sá metnaður sem umsækjendur sýna staðfestir að mikil gróska er í nýsköpun sem snýr að sjálfbærum lausnum og betri framtíð,“ segir Erna Björk Häsler, markaðsstjóri Terra.

„Við hjá Terra viljum styðja við aðila sem vinna að lausnum sem stuðla að sjálfbærni og betri framtíð fyrir okkur öll. Verkefni sem falla að styrktarstefnu Terra á sviði umhverfismála og nýsköpunar koma til greina og hlökkum við til að sjá enn fleiri spennandi umsóknir berast. Við viljum þakka öllum þeim sem hafa sent inn umsóknir og um leið viljum við hvetja þá sem eru með spennandi hugmyndir eða verkefni sem stuðla að sjálfbærni og jákvæðum breytingum í samfélaginu, til að senda inn umsókn,“ segir Erna ennfremur. Umsóknarfrestur er til 1. júní næstkomandi.