Greint var frá því í liðinni viku að Evrópuþingið hefði samþykkt hertari reglur um útlendingamál í Evrópusambandinu. Hvort þær verða teknar upp í EES-ríkjunum er DV ekki kunnugt um á þessu stigi. Meðal ráðstafana sem gripið verður til er að koma upp sérstöku stöðvum utan landamæra sambandsins fyrir hælisleitendur sem neitað er um landvistarleyfi.
Í umfjöllun Le Monde kemur fram að um sé að ræða reglur um þá sem yfirgefi heimalönd sín og leiti hælis í Evrópu. Reglurnar voru samþykktar með atkvæðum 389 þingmanna gegn 206 en atkvæðin skiptust nokkurn veginn eftir flokkslínum. Hægri flokkarnir samþykktu en vinstri flokkar voru á móti.
Einstök aðildarríki hafa öll veitt samþykki sitt en reglurnar hafa verið gagnrýndar af mannréttindasamtökum.
Umræddar reglur ganga einkum út að koma fyrir sérstökum stöðvum utan landamæra ESB fyrir hælisleitendur sem synjað hefur verið um hæli og hertari refsingar fyrir fólk í þessum hópi sem neitar að fara.
Reglurnar taka þó ekki gildi strax þar sem enn standa nokkur atriði út af eins og hvaða heimildir verða veittar til að leita að fólki sem tilheyrir áðurnefndum hópi.
Sum aðilldarríki ESB hafa lýst efasemdum einkum Frakkland og Spánn sem telja það óvíst að stöðvar af þessu tagi muni bera einhvern árangur en mannréttindasamtök segja þær geta skapað lagalegt svarthol þar sem þær verði utan ESB og aðildarríkin geti þess vegna ekki tryggt að mannréttindi verði virt.
Önnur aðildarríki til að mynda Þýskaland, Danmörk og Holland ætla þó að halda ótrauð áfram með að koma upp slíkum stöðvum en þeir sem styðja uppsetningu þeirra segja þær munu hafa fælingarmátt og letja fólk til að koma ólöglega til Evrópu.
Ekkert varð hins vegar úr sams konar áformum hjá breskum stjórnvöldum sem ætluðu að senda þennan hóp til Rúanda og áætlanir stjórnvalda á Ítalíu um að koma svona stöðvum upp í Albaníu hafa ekki gengið eftir.
Gagnrýnendur segja þessar hertu ráðstafanir í útlendingamálum ýta undir að sams konar ástand skapist í ríkjum ESB og í Bandaríkjunum þar sem liðsmenn innflytjenda- og tollaeftirlits landsins (ICE) hafa farið um götur borga til að handsama fólk sem þeir telja dvelja ólöglega í landinu. Hafa þeir gengið í þessum efnum nokkuð hart fram og hefur framganga þeirra valdið miklum deilum og uppnámi í þeim borgum þar sem þeir hafa beitt sér. Eru þó nokkur dæmi þess að fólk með bandarískan ríkisborgarrétt eða dvalarleyfi í landinu hafi verið hneppt í varðhald og haldið á stöðum sem líkt hefur verið við fangabúðir.
Hafa háværustu gagnrýnendur ICE sagt stofnunina brjóta mannréttindi og hún líti ekki á innflytjendur og hælisleitendur sem manneskjur. Skemmst er einnig að minnast þess að liðsmenn ICE hafa skotið tvær manneskjur til bana en í báðum tilfellum var um bandaríska ríkisborgara að ræða.
Fram kemur í umfjöllun Le Monde að komu hælisleitenda til Evrópu hafi fækkað á síðasta ári en nú sé unnið að því að bæta utanumhald um mál þeirra sem er vísað á brott og sendir til baka en nú eru aðeins 20 prósent þeirra sendir til heimalands síns.
