Skiptum er lokið í þrotabúi Þaks, byggingarfélags ehf. Félagið, sem var í eigu athafnamannsins Sverris Einars Eiríkssonar, var úrskurðað gjaldþrot þann 23. nóvember 2023. Engar eignir fundust í búinu en lýstar kröfur voru tæplega 157 milljónir króna, 15 milljónir í forgangskröfur og 142 milljónir í almennar kröfur.

Félagið vakti verulega athygli árið 2017 með því að hefja sölu á tíu íbúðum í uppgerðu húsi við Kársnesbraut í Kópavogi og bjóða væntanlegum kaupendum að fjármagna kaupin með því að taka allt að 95% lán.

Fyrirkomulag var þannig að kaupendur myndu taka 80% lán frá hefðbundinni lánastofnun en síðan myndi fyrirtækið bjóða upp á 15% seljanda lán á 9,8 prósent vöxtum til sjö ára. Væntanlegir eigendur þurftu því aðeins að eiga 5% eigið fé til kaupanna. Söluverð íbúðanna var á bilinu 15,9 – 23,9 milljónir króna og því þurftu kaupendur að eiga innan við eina milljón króna í eigið fé til að ganga frá kaupunum.

Þegar félagið fór í þrot sagði Sverrir Einar í samtali við DV að hann væri bjartsýnn á að fyrirtækið kæmist aftur í hans hendur og hægt yrði að gera upp við kröfuhafa. Þær áætlanir runnu hins vegar út í sandinn.

Sverrir Einar hefur koma víða við undanfarin ár. Auk íbúðasölunnar vakti hann athygli fyrir kaup og sölu á gulli og eðalsteinum, þá rak hann starfsmannaleigu um skeið, gististaði sem og pizzustað og dögurðarstaðinn vinsæla Þrastarlund. Í seinni tíð hefur framtak hans með Nýju vínbúðina sem og rekstur hans á skemmtistöðunum Exit og Bankastræti Club vakið mikla athygli.