Rúmenskum manni á fertugsaldri hefur verið birt ákæra í Lögbirtingablaðinu þar sem ekki hefur tekist að birta honum ákæru héraðssaksóknara.
Maðurinn er sakaður um að hafa í nóvember í fyrra, á tveggja daga tímabili, tekið við samtals 9180 evrum og 800 bandarískum dollurum í reiðufé frá óþekktum aðila eða aðilum. Segir í ákæru að ákærða geti ekki hafa dulist að um væri að ræða ávinning af refsiverðum brotum.
Peningarnir eru samtals að verðmæti um 1,5 milljónir íslenskra króna. Maðurinn var með þá í fórum sínum þegar hann var handtekinn í Flugstöð Leifs Eiríkssonar á Keflavíkurflugvelli þann 15. nóvember 2023. Átti hann þá bókað flug til Búdapest í Ungverjalandi.
Í ákærunni segir: „Með háttsemi sinni móttók ákærði ávinning af refsiverðum brotum, geymdi ávinninginn, flutti og leyndi ávinningnum og upplýsingum um uppruna, eðli, staðsetningu og ráðstöfun hans.“
Er þess krafist að maðurinn verði dæmdur til refsingar og peningarnir gerðir upptækir.
Málið verður þingfest við Héraðsdóm Reykjaness þann 6. nóvember næstkomandi.
