Einstaklingur sem braust inn í bíl við Borgarleikhúsið um helgina og stal þaðan rándýrum radarvara hefur séð að sér og skilað þýfinu.
Eins og DV greindi frá um helgina var brotist inn í bíl Maríu Christinu Thorarensen um helgina á meðan hún var grunlaus að njóta sýningar í Borgarleikhúsinu. Um var að ræða radarvara að verðmæti 170 þúsund krónur en í áðurnefndri frétt kom fram að María gat rakið staðsetningu tækisins. Sagðist hún ætla að afhenda lögreglu þær upplýsingar eftir helgi ef þýfinu yrði ekki skilað.
Það bar árangur því María Christina greinir frá því í færslu á Facebook-síðu sinni að umræddur þjófur hafi gefið sig fram og skilað tækinu. Var honum mætt með skilningi og hlýju.
„Þessi einstaklingur, sem missteig sig í sínu bataferli, sér eftir mikið þessu. Fólk gerir mistök, en sú staðreynd að þessi einstaklingur gerði rétt með því að skila hlutnum er það besta sem hann gat gert fyrir sjálfan sig og sinn bata. Ég er þakklát og hef von um góðvild í þessum heimi. Ég vona að einstaklingurinn finni hugrekki og leiti sér hjálpar og að hann fái þá aðstoð sem hann/hún þarf,“ skrifaði María Christina.
