Leit að Jóni Þresti Jónssyni, sem hvarf sporlaust í Dublin á Írlandi í febrúar 2019, hélt áfram í gær. Leit hefur farið fram í almenningsgarði en eins og greint var frá á dögunum telur lögregla líkur á að Jón Þröstur hafi verið myrtur og lík hans falið í umræddum garði í Dublin.

Írska útgáfa Mirror fjallar um leitina að Jóni Þresti á vef sínum í morgun og segir að líkleitarhundar hafi numið lykt á umræddu svæði.

Lögreglumenn eru sagðir hafa verið við leit á afmörkuðu svæði í Santry Demesne-garðinum í norðurhluta Dublin. Mikill gróður er á svæðinu sem er skammt frá vatni. Heimildarmaður Mirror segir að lögregla hafi haldið áfram leit í gærkvöldi jafnvel þótt komið væri myrkur.

Jón Þröstur sást síðast þegar hann gekk út af hótelherbergi sem hann dvaldi á í borginni en hann tók ekki með sér veski, síma eða vegabréf. Sýndu eftirlitsmyndavélar hann ganga góðan spöl frá umræddu hóteli en síðan rofnaði slóðin.

Dublin Live greindi frá því um liðna helgi að Jón Þröstur hefði farið til fundar við ótilgreindan aðila, til átaka hafi komið á þeim fundi og Jón Þröstur látið lífið. Hann er sagður hafa tapað þúsundum evra í pókerspili í Dublin áður en hann hvarf.

Lögregrla rannsakaði tvær nafnlausar ábendingar sem hún fékk og virðist leitin í umræddum garði hafa farið af stað eftir að þær ábendingar bárust.