Kópavogsbær hefur loks höggvið á hnútinn varðandi hið umdeilda hús við Melgerði 11 í Kópavogi. Í húsinu eru óleyfisframkvæmdir en engu að síður unnu eigendur mál gegn bænum fyrir úrskurðarnefnd. Lengi hefur bærinn trassað að afgreiða málið en nú hefur bæjarráð samþykkt umbeðnar breytingar og vísað málinu til afgreiðslu í bæjarstjórn.

Nágrannar mjög ósáttir

DV fjallaði um málið í byrjun september. Það er að Kópavogsbær væri í vanda vegna hússins við Melgerði 11 á Kársnesi. Húsið er gamalt einbýlishús sem hefur verið hlutað niður í nokkrar íbúðir án leyfis. Um tíma voru 17 manns með lögheimili í því.

Eigendur vildu stækka húsið og bílastæði en bærinn hafnaði beiðnum um það. Nágrannar lýstu sig mjög mótfallna breytingunum, enda væri erill mikill í kringum húsið og bílar í eigu leigjenda fylltu sameiginleg bílastæði í götunni.

Sjá einnig:

Erfitt mál fyrir Kópavogsbæ – „Húsið hefur verið hlutað niður í að lágmarki þrjár íbúðir“

Engu að síður felldi Úrskurðarnefnd umhverfis og auðlindamála ákvörðun Kópavogs um að hafna beiðni eigendanna úr gildi í maí síðastliðnum. Var bærinn þá kominn í klandur og frestaði afgreiðslunni sífellt á fundum. Minnihlutinn var mjög hávær um að það gengi ekki að samþykkja breytingarnar á meðan þessar óleyfisframkvæmdir væru til staðar. Meðal annars með tilliti til eldvarna.

Hættulegt fordæmi

Beiðni eigenda við Melgerði 11 var samþykkt í skipulagsráði þann 21. október. Á fundi bæjarráðs í gær, 7. nóvember, var hún einnig samþykkt af fulltrúum Sjálfstæðisflokks og Framsóknarflokks og málinu vísað til bæjarstjórnar. En fulltrúar minnihlutans, Samfylkingar, Viðreisnar, Pírata og Vina Kópavogs töldu það ábyrgðarlaust og stangast á við hagsmuni íbúa að samþykkja tillöguna. Málið gæti haft fordæmisgildi.

„Fyrir nefndina hafa komið fram upplýsingar um margháttaðar óleyfisframkvæmdir víða við Melgerði og óleyfisframkvæmdir í fasteigninni, sem sótt er um breytingu á. Þá liggur fyrir þessum fundi greinargerð skipulagsdeildar um fjölda afgreiðslna beiðna um breytingar og aukið byggingarmagn víðs vegar í Kópavogi o.fl. Allt þetta varpar ljósi á hversu mikilvægt er að byggð þróist í samræmi við heildstæða og samþætta stefnumörkun í formi deiliskipulags,“ segir í bókun minnihlutans.